Dr. Berglind Guðmundsdóttir sálfræðingur á áfallamiðstöð Landspítala Fossvogi og sálfræðiþjónustu endurhæfingarsviðs var verðlaunuð á ráðstefnu um rannsóknir í líf- og heilbrigðisvísindum við Háskóla Íslands í janúar 2009. Guðlaugur Þór Þórðarson heilbrigðisráðherra afhenti Berglindi verðlaunin fyrir verkefnið: Áhrif jarðskjálftans 29. maí 2008 á íbúa á Suðurlandi. Um er að ræða frumniðurstöður víðtæks rannsóknarsamstarfs LSH við Háskóla Íslands (Miðstöð í lýðheilsuvísindum, sálfræðideild, Rannsóknamiðstöð í jarðskjálftaverkfræði), Landslæknisembættið, Rauða kross Íslands, Þjóðkirkjuna og almannavarnadeild Ríkislögregluembættisins. Rannsóknarverkefninu lýkur í maí 2009.
Náttúruhamfarir eru alvarleg ógn sem fjöldi Íslendinga býr við. Hamfarir geta haft alvarlegar og varanlegar afleiðingar fyrir heilsu, starfsgetu og lífsgæði. Þrátt fyrir það hafa afleiðingar náttúruhamfara lítið verið rannsakaðar hér á landi og vísindaleg þekking því takmörkuð. Jarðskjálftinn 29. maí í fyrra skapaði því óheppilegt en einstakt rannsóknartækifæri og var tilgangurinn að kanna áhrif hans á andlega og líkamlega heilsu íbúa á Suðurlandi. Þátttakendur voru 1514 einstaklingar 18 ára og eldri sem búsettir voru á Suðurlandi og fundu fyrir skjálftanum. Þátttakendur fengu upplýsingabréf og spurningalista senda í tölvupósti eða bréfpósti. Spurningarnar lutu að lýðfræðilegum upplýsingum, upplifun á skjálftanum, heilsuhegðun, þjónustunýtingu, áfallastreitueinkennum, geðlægð, kvíða, áfengisneyslu og bjargráðum.
Helstu niðurstöður rannsóknar Berglindar sýna að 75% þátttakenda upplifðu jarðskjálftann sem alvarlegt áfall. Þeir greindu frá verulegum ótta, hjálparleysi eða ótta um líf sitt eða annarra í fjölskyldunni þegar skjálftinn reið yfir. Alls uppfylltu 7% þátttakanda viðmið um áfallastreituröskun, 7% greindu frá miðlungs til alvarlegum þunglyndiseinkennum og 8% upplifðu miðlungs til alvarleg kvíðaeinkenni tveimur til þremur mánuðum eftir jarðskjálftann. Konur voru líklegri en karlar til að upplifa skjálftann sem áfall og greina frá sálrænum vanda. Niðurstöðurnar sýna að jarðskjálftinn hafði veruleg áhrif á líðan íbúa á svæðinu og var tíðni áfallastreituröskunar hærri en búist var við samkvæmt erlendum rannsóknum.
Rannsóknin varpar ljósi á mikilvægi þess að kanna hvað hefur áhrif á bataferli einstaklinga eftir hamfarir á Íslandi og þá sérstaklega hvaða þættir stuðla að eða hindra bata.