Geðgjörgæsla

Bílastæði: Upplýsingar um bílastæði við Hringbraut má finna hér>>

Strætóleiðir: Leiðir 1, 3 og 6 stoppa við Gömlu Hringbraut, Læknagarða og Klambratún. Leiðir 5 og 15 stoppa við Sjúkrahótelið og leið númer 18 stoppar á Snorrabraut.

Á geðgjörgæslu eru 10 einbýli í tveimur kynjaskiptum álmum. Einnig er eitt öryggissvæði sem er einungis notað þegar brýn þörf er á að einstaklingur fái meðferð í umhverfi þar sem áreiti er takmarkað. Deildin er rúmgóð með þremur dagstofum, slökunarherbergi, virkniherbergi og tómstundaherbergi. Áhersla er lögð á hlýlegt, rólegt og öruggt umhverfi.

Á deildinni er veitt sérhæfð meðferð og umönnun einstaklinga með alvarleg geðræn einkenni. Gagnreynd þekking og hugmyndafræði um geðgjörgæslu eru í fyrirrúmi. Meðferð er einstaklingsmiðuð og skipulögð af meðferðarteymi í samstarfi við sjúkling. Leitað er eftir samvinnu við nánustu aðstandendur í samráði við sjúkling og þeim boðinn stuðningur á meðan meðferð stendur.

Heimsóknartímar: Frá kl. 14:00-21:00 virka daga, um helgar og rauða daga í samráði við meðferðarteymi. Heimsóknir fara fram í heimsóknarherbergi og panta þarf heimsóknartíma í síma 543-4036.

Innlagnir eru í gegnum bráðaþjónustu geðsviðs og tilvísanir frá öðrum deildum og teymum spítalans. Legutími er breytilegur, allt frá því að vera nokkrar klukkustundir upp í nokkrar vikur. Þegar gjörgæslumeðferð lýkur halda flestir sjúklingar meðferð sinni áfram á annarri deild innan geðþjónustunnar.

Unnið er eftir hugmyndafræði um öruggar sjúkradeildir: “Safewards” sem fjallar um heildræna umgjörð hjúkrunar og stjórnunar á geðdeildum.

Hugmyndafræðin er hönnuð til þess að draga úr árekstrum og þvingandi úrræðum á geðdeildum með því að styðja við skipulag, teymisvinnu, umhverfi, stuðning, þekkingu, upplýsingaflæði og fagleg vinnubrögð.

Nánari upplýsingar um hugmyndafræðina má finna á heimasíðu Safewards: https://www.safewards.net/

Aðstaða og samskipti:

Landspítali setur sjúklinginn í öndvegi og leggur áherslu á að þjónustan sé bæði örugg, góð og veitt af umhyggju. Endurgjöf er okkur afar mikilvæg svo bæta megi þjónustuna. Við tökum glöð á móti ábendingum og/eða hrósi. 

Kynningarmyndband: https://www.facebook.com/watch/?v=775502781079266