Ráðgjafi / stuðningsfulltrúi á legudeild geðrofssjúkdóma

Legudeild geðrofssjúkdóma leitar að jákvæðum, sjálfstæðum og metnaðarfullum liðsfélaga. Starfið hentar vel þeim sem brenna fyrir samskipti, virkni, öryggi og fjölbreytta vinnu. Áhersla er lögð á framúrskarandi notendamiðaða þjónustu og góðan starfsanda. Starfshlutfall er 80 -100% og er starfið laust frá 11. ágúst 2025 eða eftir samkomulagi.   

Legudeild geðrofssjúkdóma sinnir greiningu, meðferð og endurhæfingu fólks með geðrofssjúkdóma. Deildin er 16 rúma, 10 rými ætluð einstaklingum með bráð veikindi og 6 ætluð til endurhæfingar. Á deildinni er boðið upp á samtalsmeðferð, virknimeðferð, fræðslu, lyfjameðferð og mikil áhersla er lögð á fjölskylduvinnu. Markmið meðferðarvinnu er að auka lífsgæði og valdefla sjúklinga, draga úr hamlandi geðrofseinkennum og þjálfa upp bjargráð til að lifa með geðrofssjúkdóm. Starfið getur falið í sér líkamlega umönnun, hvatningu við athafnir daglegs lífs, ferðir í ýmsa virkni og að tryggja öryggi sjúklinga og starfsmanna á deild. Við leggjum áherslu á fjölbreytni í starfsmannahópnum svo hægt sé að nýta þekkingu og færni hvers og eins starfsmanns í deildarstarfið til að styðja við einstaklingsmiðaða meðferð.  

Unnið er á þrískiptum vöktum, morgun-, kvöld- og næturvöktum. Boðið er upp á einstaklingsmiðaða aðlögun og stuðning í starfi. Vinnuvika starfsfólks í fullri vaktavinnu er 36 stundir og getur orðið minni eftir samsetningu vakta. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.