Vísindaþing Norræna líffæraígræðslufélagsins (Scandinavian Transplantation Society Congress) var haldið í Hörpu tónlistar- og ráðstefnuhúsi dagana 31. ágúst til 2. september 2022. Ráðstefnan þótti takast sérlega vel og dagskráin vera afar áhugaverð.
Norræna líffæraígræðslufélagið var stofnað í Árósum árið 1983 í þeim tilgangi að efla samstarf Norðurlandaþjóðanna um líffæraígræðslur. Í seinni tíð hefur vísindaþingið verið meginhlutverk félagsins og hafa Norðurlöndin skipst á að halda þingið. Daglegt samstarf um líffæragjafir og líffæraaígræðslur hefur hins vegar verið á vettvangi Scandiatransplant sem annast skipti og ráðstöfun líffæra og heldur utan um sameiginlegan biðlista. Þetta samstarf hefur verið mjög árangursríkt en um 2000 sjúklingar gangast undir líffæraígræðslur árlega innan vébanda Scandiatransplant.
Þingið í Hörpu var hið þrítugasta í röðinni en þessar ráðstefnur hafa jafnan verið haldnar annað hvert ár. Síðasta þing sem halda átti í Helsinki féll reyndar niður vegna heimsfaraldurs kórónuveirunnar. Því var nú um að ræða langþráð tækifæri fyrir lækna, annað heilbrigðisstarfsfólk og vísindamenn sem starfa við líffæraígræðslur til að hittast og kynna sér nýjungar og skiptast á skoðunum um áhugaverð málefni á þessum vettvangi. Enn fremur til að styrkja tengsl og samstarf sín á milli.
Dagskrá þingsins fól í sér margvísleg viðfangsefni og meðal fyrirlesara voru þekktir vísindamenn og brautryðjendur á sviði líffæraígræðslna innan og utan Norðurlandanna. Það sem bar hæst var:
- Opnunarhátíð þar sem var fjallað ítarlega um fyrstu ígræðslu beggja handleggja og annarrar axlar að hluta sem gerð var í Lyon í Frakklandi árið 2021. Þeir sáu sameiginlega um flutninginn ígræðsluskurðlæknirinn Lionel Badet við Háskólasjúkrahúsið í Lyon (Hospices Civils de Lyon - Centre Hospitalier Universitaire) og handleggjaþeginn Guðmundur Felix Grétarson. Frásögn Felix af slysinu örlagaríka sem leiddi til brottnáms beggja handleggja og baráttunni fyrir handleggjaígræðslu lét engan ósnortinn. Auk þess ávarpaði forseti Íslands opnunarhátíðina.
- Frásögn af tilraunum við ígræðslur nýrna og hjarta úr svínum í menn sem leiddi í ljós að veruleg framþróun hefur átt sér stað á þessu sviði sem vekur vonir um að unnt verði að nýta þessi líffæri til ígræðslu í menn í framtíðinni. Það var ígræðsluskurðlæknirinn Robert Montgomery sem starfar við NYU Langone-sjúkrahúsið í New York er flutti erindi um þessar áhugaverðu tilraunir.
- Ýmis erindi um mikilvægi ónæmisviðbragða fyrir útkomu líffæraígræðslu og leiðir til að vinna bug á áhrifum þeirra. Ragnar Pálsson nýrnalæknir á Landspítala flutti fyrirlestur um þróun og nýtingu lífmerkja (biomarkers) í meðferð sjúklinga með ígrædd líffæri.
- Fjallað var um mat og meðferð líffæragjafa og um veirusýkingar meðal líffæraþega m.a. Covid-19.
- Kynnt voru vísindaágrip með flutningi erindis eða með veggspjaldi.
Forseti þingsins var Runólfur Pálsson og formaður undirbúnings- og vísindanefndar Margrét B. Andrésdóttir yfirlæknir nýrnalækninga.
Forseti Íslands bauð til hádegisverðar á Bessastöðum þeim sem stóðu að undirbúningi líffæraígræðsluþingsins, fulltrúum Scandiatransplant, Guðmundi Felix og franska skurðlækninum ásamt mökum. Myndirnar sem voru teknar þá eru birtar með leyfi forsetaembættisins.