Leit
Loka
 

Að vinna á Landspítala

Landspítali er suðupunktur þekkingar, þróunar og þverfaglegrar samvinnu.

Saman viljum við vera einn besti vinnustaður landsins sem býður upp á samkeppnishæf kjör. Vilt þú vera með?

Mannauðsmínútan og starfamínútan (myndbönd)

Á Landspítalanum starfa yfir fimm þúsund starfsmenn í fjölbreyttum störfum. Það er áhugavert að kynna sér fólkið á bak við störfin og fá innsýn í ólík störf. Í stuttum myndböndum fáum við að kynnast fólkinu sem vinnur á Landspítala.

Mannauðsmínútan

Starfamínútan

STARFAMÍNÚTA (15) // Hafdís Guðnadóttir, ljósmóðir á fæðingarvakt
  • 16. febrúar 2018
  • Starfsemin

STARFAMÍNÚTA (15) // Hafdís Guðnadóttir, ljósmóðir á fæðingarvakt

Hafdís Guðnadóttir er ljósmóðir á fæðingarvakt Landspítala. Hjá Landspítala starfa í dag um 1.700 hjúkrunarfræðingar og þar af eru um 160 ljósmæður. Hafdís ákvað strax sem unglingur að leggja starfið fyrir sig og fékk innblástur við að fylgjast með hryssu kasta folaldi. Fagmennska og fjölbreytt verkefni eru bestu kostir Landspítala sem vinnustaðar, að mati Hafdísar. En hvað gera ljósmæður? Samkvæmt starfslýsingunni eru ljósmæður ábyrgir fagaðilar sem veita nauðsynlegan stuðning, umönnun og ráðgjöf til kvenna á meðgöngu, í fæðingu og sængurlegu, stunda fæðingarhjálp og annast nýbura og ungbörn. Þessi umönnun felur í sér fyrirbyggjandi aðgerðir, stuðning við eðlilegt ferli fæðingar, greiningu á frávikum hjá móður og barni, milligöngu um læknishjálp eða aðra viðeigandi meðferð og bráðahjálp. Ljósmæður gegna einnig mjög mikilvægu hlutverki í heilbrigðisfræðslu og ráðgjöf -- ekki aðeins fyrir konur, heldur einnig fjölskylduna og þjóðfélagið í heild. Í hlutverki ljósmæðra felst þannig fræðsla á meðgöngu, undirbúningur fyrir foreldrahlutverkið, ásamt fræðslu um heilbrigði, kynheilbrigði og umönnun barna. Skipuleg kennsla í ljósmóðurfræði hefur verið á Íslandi í 257 ár -- eða allt frá árinu 1761. Á vefsvæðinu ljosmaedrafelag.is segir meðal annars: "Árið 1760 fól Danakonungur Bjarna Pálssyni landlækni, með embættisbréfi, að “taka eina eða fleiri siðsamar konur og veita þeim tilhlýðilega fræðslu í ljósmóðurlist og vísindum”. Árið 1761 var ráðin ljósmóðir frá Danmörku, Margrethe Katrine Magnússen, til að sjá um klíníska kennslu. Fyrsta ljósmóðurpróf, sem skráð er á Íslandi tók Rannveig Egilsdóttir að Staðarfelli á Fellsströnd, árið 1768." Í dag er námið 120 eininga sérhæft nám við Háskóla Íslands, sem tekur tvö ár. Inntökuskilyrði í námið er viðurkennt próf í hjúkrunarfræði í því landi sem nám var stundað og íslenskt hjúkrunarleyfi frá heilbrigðis- og tryggingaráðuneyti. Ljósmóðurnámið felur í sér vísindalega starfsþjálfun sem lýkur með embættisprófi.
STARFAMÍNÚTAN (13) // Viktoría Hróbjartsdóttir, læknakandídat
  • 06. febrúar 2018
  • Starfsemin

STARFAMÍNÚTAN (13) // Viktoría Hróbjartsdóttir, læknakandídat

Viktoría Hróbjartsdóttir er læknakandídat á Landspítala. Í þessari Starfamínútu er Viktoría í starfsþjálfun á Barnaspítala Hringsins. Meiðsli og veikindi vöktu athygli og forvitni hjá Viktoríu þegar í æsku og hún stefndi því strax í grunnskóla á læknisfræðina. Námið var krefjandi og spennandi, en hún lærði í Debrecen í Ungverjalandi, sem er önnur stærsta borg Ungverjalands og fjölsóttur áfangastaður fyrir Íslendinga í námi af þessu tagi. Að fara út í nám, upplifa þar nýja hluti og koma síðan heim með þekkingu er frábær högun. Viktoríu þykir starfsandinn á Landspítala einstaklega góður. Íslenskir læknar eru að jafnaði með 12-14 ára tímabil af menntun og þjálfun að baki, en jafnvel meira hafi þeir lokið doktorsnámi. Fyrst er sex ára grunnám við læknadeild Háskóla Íslands eða sambærilegt nám við háskóla erlendis -- til dæmis í Debrecen. Fyrri þrjú árin eru nánast eingöngu bókleg kennsla, en seinni þrjú eru verknám á spítala samfara bóklegu námi. Að sex ára grunnámi loknu tekur við kandídatsár, en það felst í verknámi á Landspítala og víðar. Að því loknu fæst starfsleyfi. Langflestir læknar afla sér síðan sérfræðimenntunar sem er að lágmarki fimm ár. Kandídatsnemar öðlast mikla reynslu með því að kynnast starfinu á helstu deildum Landspítala. Nemar eru fjóra mánuði í lyflækningum, fjóra mánuði í heimilislækningum, tvo mánuði í skurðlækningum eða á slysa- og bráðamóttökunni og hafa svo tvo mánuði í val.
Var efnið hjálplegt?
Takk fyrir
Af hverju ekki?