Menntun heilbrigðisstétta

Landspítali er eina háskólasjúkrahús landsins. Þar eru því samtvinnaðar í daglegu starfi kennsla, þjónusta og rannsóknir. Á Landspítala (LSH) fer fram með einum eða öðrum hætti, starfsþjálfun (klínísk þjálfun) langflestra nemenda í heilbrigðisvísindum og er spítalinn þannig undirstaðan undir framtíðarmönnun heilbrigðiskerfisins.

Árlega sækja þannig ríflega 1.300 nemendur menntun sína og starfsþjálfun til Landspítala og þar eru á hverjum degi
yfir 250 nemendur við nám. Stærstir eru hópar nemenda frá Háskóla Íslands (HÍ) í læknisfræði og hjúkrunarfræði en nemendur úr öðrum greinum s.s. ljósmóðurfræði, lyfjafræði, sjúkraþjálfun, tannlæknisfræði, sálfræði, félagsráðgjöf, næringarfræði, lífeindafræði, geislafræði og eftir atvikum fleiri greinum, sækja einnig menntun sína til spítalans. 

Þá koma einnig til þjálfunar nemendur annarra skóla, s.s. Háskólans á Akureyri og Fjölbrautaskólanna í Ármúla og Breiðholti. Landspítali verður því að hafa til reiðu, fyrir nemendur og starsfmenn þessara stofnananna aðstöðu til klínísks náms og fræðastarfs. Starfsmenn spítalans hafa því margir jafnframt kennslustöður við háskólastofnanir, einkum Háskóla Íslands.

Í vaxandi mæli fer fram framhaldsnám við spítalann og þar starfar sameiginlegt framhaldsmenntunarráð LSH og Háskóla Íslands (HÍ). Slíkt nám í heilbrigðisvísindagreinum skiptist í masters- og doktorsnám sem er rannsóknatengt framhaldsnám, auk þess sem spítalinn bíður upp á fyrstu árin í ákveðnu sérfræðinámi.

Landspítali verður að tryggja sínum nemendum nám og þjálfun sem stenst alþjóðlegan samanburð. Það hefur tekist og eiga nemendur skólanna, sem notið hafa frekara náms á spítalanum, auðvelt með að komast í áfram í framhaldsnám og störf á bestu stöðum erlendis.

Kennsluefni:

Barnalækningar >>