Tilvísun á BUGL
Leiðbeiningar vegna tilvísunar
Þegar grunur vaknar um geðrænan vanda hjá barni / unglingi getur farið af stað ferli sem leiðir til tilvísunar á BUGL. Forráðamenn leita fyrst eftir þjónustu innan síns sveitarfélags s.s. hjá heilsugæslu, félagsþjónustu/þjónustumiðstöðvum eða sálfræðiþjónustu skóla.
Frumgreiningu þarf að gera áður en vísað er á BUGL. Í tilvísun þurfa að liggja fyrir og koma fram upplýsingar um vanda barnsins og niðurstöður athugana á þroskastöðu barns/unglings. Nauðsynlegt er að búið sé að gera vitsmunaþroskamat (WISC-IV eða WIPSI) og mikilvægt að geta útkomu og senda tölulegar niðurstöður og prófíla annarra matslista og skim- eða greiningartækja, sem hafa verið undanfari tilvísunar, með sem fylgigögn.
Hverjir eru tilvísendur?
Helstu tilvísendur á BUGL eru greiningar-/meðferðarteymi, sérfræðilæknar, heilsugæslulæknar, sálfræðingar og aðrir sérfræðingar; leikskóla- og grunnskólaþjónustu, félagsþjónustu eða Barnaverndar. Þessir aðilar meta vandann í tengslum við fjölskyldu barns, umhverfi og skóla og veita viðeigandi stuðning og meðferðarúrræði.
Sé það sameiginlegt mat ofangreindra að viðkomandi þurfi sérhæfðari þjónustu er það á ábyrgð þess sérfræðings sem framkvæmt hefur athuganir að vísa á BUGL.
Hér að neðan er að finna tilvísunareyðublað á BUGL. Hægt er að fylla blaðið út rafrænt en það þarf síðan að prenta það út og senda á Inntökuteymi BUGL. Nauðsynlegt er að senda með tilvísun heimild með undirskrift foreldra (sjá meðfylgjandi eyðublað hér fyrir neðan).