Talþjálfun
Talmeinafræðingar sjá annars vegar um greiningu og meðferð kyngingartregðu og hins vegar greiningu og meðferð tal- og málmeina.
Talmeinafræðingar meta mál og tal með sérstökum prófum og gefa ráð um tjáskipti og lengri tíma meðferð. Þeir aðstoða sjúklinga við að ná sem bestri færni til tjáskipta, gjarnan í góðri samvinnu við aðstandendur.
Sumir eiga erfitt með að kyngja fæðu og meta talmeinafræðingar slík vandamál, sem kallast kyngingartregða. Oft ráðleggja talmeinafræðingar breytingar á mat og drykk, t.d. að þykkja drykki og mauka mat. Í sumum tilvikum getur verið mælt með sérstakri kyngingarþjálfun eða finna aðrar leiðir til að nærast.
Hjá talmeinaþjónustunni starfa fjórir talmeinafræðingar. Þeir veita þjónustu á legudeild, dagdeild og göngudeild á Landspítala Grensási og á öðrum deildum spítalans eftir því sem við verður komið.
Talmeinafræðingar sitja í þverfaglegum teymum á sjúkrahúsinu, auk þess sem þeir taka á móti talmeinafræðinemum og nemum annarra fagstétta í starfsnámi á endurhæfingardeildinni á Grensási.